» » Літаратурная вечарына “ДЗЕНЬ КНІГІ”

Літаратурная вечарына “ДЗЕНЬ КНІГІ”


23 красавіка, у дзень, калі, паводле не да канца спраўджанай легенды, пакінулі свет Ўільям Шэкспір і Мігель дэ Сервантэс, а міжнародная пісьменніцкая супольнасць адзначае Сусветны дзень кнігі і аўтарскага права, Беларускі ПЭН-цэнтр і Перакладчыцкая Майстэрня запрашаюць на літаратурную вечарыну “ДЗЕНЬ КНІГІ”.

Паэты, празаікі, перакладчыкі-паэты і перакладчыкі-празаікі прадставяць па адной важнай у сваёй творчасці кнізе, раскажуць пра гісторыю яе стварэння/перакладання, падзеляцца загадкамі і выклікамі, з якімі сутыкнуліся і якім урэшце далі (або так і не далі) рады, прачытаюць найцікавейшыя фрагменты з яе.

Удзел бяруць: Уладзімір Арлоў, Лявон Баршчэўскі, Альгерд Бахарэвіч, Алеся Башарымава, Уладзімір Лянкевіч, Наталля Паваляева, Андрэй Хадановіч, Юля Цімафеева, Марына Шода, Ганна Янкута.

У межах вечарыны будуць прадстаўленыя паэтычныя зборнікі Ўільяма Блэйка, Эрлінга Кітэльсена, Уладзіміра Маякоўскага, Эдыты Сёдэргран і Ўолта Ўітмэна з серыі “Паэты планеты”, а таксама зборнік дэтэктыўны х апавяданняў пра Старажытны Кітай знакамітага Роберта ван Гуліка “Следства вядзе суддзя Дзі”; раман букераўскай лаўрэаткі Вольгі Такарчук “Вядзі свой плуг праз косткі мёртвых”, што колькі дзён таму зноў вывеў пісьменніцу ў шорт-ліст Букера; дзіцячая кніга Ульфа Старка і Лінды Бундэстам “Звяры, якіх ніхто не бачыў, апроч нас”. Альгерд Бахарэвіч апавядзе пра лінгвістычныя і перакладчыцкія прыгоды вакол рамана “Сабакі Эўропы”, уганараванага летась прэміяй “Кніга году”, а Ўладзімер Арлоў пачытае з празаічнага зборніка “Танцы над горадам”, што прынёс свайму аўтару прэмію Гедройця за 2018 год.

Пачатак а 19.00.

Літаратурны музей Максіма Багдановіча (вул. Максіма Багдановіча, д. 7а.)

Уваход вольны.

Пра Сусветны дзень кнігі і аўтарскага права.