» » Чацвёртая Вышаградская літаратурная прэмія Ўсходняга партнёрства

Чацвёртая Вышаградская літаратурная прэмія Ўсходняга партнёрства


11 красавіка сёлета будзе ўручаная чацвёртая Вышаградская літаратурная прэмія Ўсходняга партнёрства (Visegrad Eastern Partnership Literary Award).

На гэтую прэмію намінуюцца кнігі паэзіі, прозы ці нон-фікшан з шасці краін Усходняга партнёрства (Беларусі, Украіны, Малдовы, Азербайджана, Арменіі і Грузіі).

Папярэднімі лаўрэатамі прэміі былі Ігар Бабкоў з кнігай “Хвілінка” ў 2014 годзе, Акрам Айліслі з Азэрбайджану з кнігай “Каменныя сны” ў 2015 годзе, Сафія Андруховіч з Украіны з кнігай “Фэлікс Аўстрыя” ў 2016 годзе.

Пасля гадавога перапынку летась на прэмію былі намінаваныя 14 аўтараў з Усходняй Эўропы. Трое з чатырнаццаці – беларускія літаратары: Альгерд Бахарэвіч (за кнігу “Сабакі Еўропы”), Андрусь Горват (за кнігу “Радзіва “Прудок”) і Макс Шчур (за кнігу “Завяршыць гештальт”). Лаўрэатам стаў украінскі пісьменнік, родам з Данецку, Уладзімір Рафеенка, за раман “Доўгія часы” (у арыгінале “Долгота дней”). Расклад цырымоніі ўзнагароджвання можна адсачыць на старонцы прэміі ў фэйсбуку.

На цырымоніі таксама пройдзе прэзентацыя перакладу “Доўгіх часоў” Уладзіміра Рафеенкі на чэшскую мову (паводле статуту прэміі, кніга пераможцы перакладаецца на адну з моў Вышаградскай чацвёркі – чэшкую, славацкую, вугорскую ці польскую).

Праект мае на мэце стварыць платформу для дыялогу паміж інтэлектуаламі з постсавецкіх краін і краін Вышаградскай чацверкі. Разам з гэтым праект стварыў і штогод напаўняе базу дадзеных літаратурнага жыцця рэгіёна на сваім блогу.